file image
सर्लाही – नेपाली कम्युनिस्ट पार्टीका सहसंयोजक तथा पूर्वप्रधानमन्त्री माधवकुमार नेपालले पछिल्लो प्रतिनिधि सभा निर्वाचनको नतिजाप्रति आशंका व्यक्त गरेका छन्। उनले निर्वाचन प्रक्रिया पूर्ण रूपमा निष्पक्ष र पारदर्शी भएकोमा प्रश्न उठाउँदै यस सम्बन्धी वास्तविकता समयक्रममा सार्वजनिक हुने बताएका छन्।
अखिल नेपाल महिला सङ्गठनको एकता राष्ट्रिय भेलालाई सम्बोधन गर्दै नेपालले निर्वाचनका क्रममा केही राज्य संयन्त्रहरूको भूमिका शंकास्पद रहेको संकेत गरे। उनले त्यसबारे थप अध्ययन र खोजबिन भइरहेको उल्लेख गर्दै भविष्यमा तथ्यहरू क्रमशः बाहिर आउने दाबी गरे।
उनले राष्ट्रिय स्वतन्त्र पार्टीको निर्वाचन सफलतालाई दीर्घकालीन राजनीतिक उपलब्धि नभई अस्थायी लहरको संज्ञा दिए। उक्त सफलताको पृष्ठभूमि र कारणबारे विभिन्न कोणबाट समीक्षा भइरहेको उनको भनाइ थियो। कार्यक्रममा बोल्दै नेपालले महिला, दलित तथा पछाडि पारिएका समुदायका अधिकार सुनिश्चित गर्न आफ्नो पार्टीले महत्वपूर्ण भूमिका खेलेको दाबी गरे।
उनले सामाजिक न्याय र समावेशी अधिकारका मुद्दामा पार्टी सधैं अग्रपंक्तिमा रहेको उल्लेख गरे। साथै उनले पार्टीका नेता तथा कार्यकर्तालाई निराश नहुन आग्रह गर्दै राजनीतिक संघर्ष र संगठन निर्माणको अभियानलाई थप सशक्त रूपमा अघि बढाउन आह्वान गरे।
तपाईको प्रतिक्रिया !
सम्बन्धित समाचार
